 Maamulka Puntland ayaa sheegay in ciidankiisa ay iska caabbiyeen weerar ay Al-Shabaab xalay ku soo qaadday ciidamo ku sugan meel duleedka magaalada Boosaaso kaga beegan 40 km dhanka koonfur galbeed, kuwaasoo ilaalo ka haya buuraleyda Galgala ee gobolka Bari.
War-saxaafadeed ka soo baxay wasaaradda amniga Puntland ayaa lagu sheegay in weerarkaas lagu dilay saddex ka tirsanaa maleeshiyada Shabaab, shan kalana lagu dhaawacay, halka uu weerarka ku dhintay hal askari oo ciidamada Puntland ka mid ahaa.
Puntland waxay kaloo sheegtay in shalay ay ciidankeeda qabteen nin ka tirsanaa al-Shabaab isagoo aasaya miino.
Dhanka kale, war-saxaafadeedka ayaa lagu sheegay inay jiraan xogoa sirdoon oo caddeynaya in uu xiriir ka dhexeeyo Al-Shabaabka ku sugan buuraleyda Galgala iyo kooxaha burcad badeedda Soomaalida. |
· 
